A v nedilju rano

A v nedilju rano,
słonečko vychodit,
|: mołodyj vojačok, mołodyj vojačok
po kasarni chodit. :|

Po kasarni chodit,
šablju v rukach nosit,
|: pana kapitana, pana kapitana
dovolenku prosit. :|

Pane kapitane,
puste nja do domu,
|: zochabił ja divča, zochabił ja divča
a sam ne znam komu. :|

Pušču ja tja, pušču,
ale ne samoho,
|: osedlaj si konja, osedlaj si konja,
konja voronoho. :|

Konja voronoho,
so zlatym sivercom
|: prideš ku divčini, prideš ku divčini,
rozveseľ jej serdce. :|